Пионерское движение

Ахтылҕаннаах оҕо сааспыт абылаҥар куустаран ыллыбыт

Исиидэр Бараахап аатынан 1 №-дээх, быйыл күһүн төрүттэммитэ 140 үбүлүөйдээх сааһын көрсөөрү долгуйа бэлэмнэнэр оскуола ыам ыйын 29 күнүгэр Эһэлээх Маар алааһыгар өтөрүнэн умнуллубат бэртээхэй тэрээһини ыытта. Ол курдук, инициатор учуутал Антонина Гаврильевна Хобусарова быһаччы салалтатынан тэрийэр хамыыһыйа үлэлээн Пионерия күнүгэр аналлаах дружина сбора буолла.

Олус үчүгэй, күннүүн үөрбүккэ дылы арылхай, сайыҥҥы күн туран биэрэн дууһаны ыраахха, ааспыкка долгуйа угуйда.

Манна саамай ахтылҕаннаах, кэтэһиилээх күндү ыалдьытынан биһиги оскуолаҕа айымньылаах үлэтин саҕалаан үгүс үтүө ситиһиилэри аҕалбыт, Үөһээ Бүлүү бочуоттаах олохтооҕо, старшай пионер-баһаатай Елена Алексеевна Егорова буолла. Кинини биһиги оскуолаҕа үлэлээбит кэмнэригэр үөрэммит, пионерскай үлэҕэ көхтөөхтүк кыттыбыт, билигин ситиһиилээхтик үлэлии сылдьар учууталлар Наталья Васильевна Чуручанова,Таисия Николаевна Семенова, Галина Николаевна Жайсанбаева, Татьяна Ильинична Васильева, Алиса Александровна Егорова уонна ветеран учуутал Людмила Никифоровна Васильева уонна да бары үөрэ-көтө көрүстүбүт. Истиҥник ааспыты ахтыһан, оҕо саас умнуллубат кэрэ түгэннэрин, пионерга киирии үрдүк өрөгөйүн дуоһуйа санатыһан ыллыбыт.

Зоя Космодемьянская аатынан пионерскай дружина этэрээттэринэн арахсан, речевка, ырыа бэлэмнээн стройдаабыттарын кэннэ дружина былааҕын, пионерскай үлэҕэ ситиһиилэринэн «Артек» лааҕырга сылдьар чиэскэ тиксибит Галина Николаевна Миронова барабаан, горн тыаһыгар доҕуһуоллатан таһаарда. Оскуола саҕаттан дружина баһаатайынан этэн-тыынан үлэлээбит, туйгун үөрэнээччи Наталья Васильевна Чуручанова, кыһыл хаалтыһа, пилотката тэтэрэ кыыһан туран, этэрээттэр председателлэрин рапорын тутта уонна старшай пионер-баһаатайга Елена Алексеевнаҕа этэрээттэр дружина сборугар бэлэмнэрин туоһулаан рапорт биэрэр түгэнэ олус долгутуулаахтык ааста. Онтон бука бары «Взвейтесь, кострами!» ырыаны ыллаатыбыт. Бу кэннэ урут пионерга киирэри этинэн-хаанынан билбэккэ маппыт учууталлары, ол иһигэр оскуолабыт директора Анатолий Викторович Захаровы, үөрүүлээх быһыыга-майгыга пионерга ылыы сиэрэ-туома дохсун ытыс тыаһыгар уйдаран ыытылынна.

Бу кэннэ эгэлгэ астаах остуол тула олорон истиҥ сэһэргэһиилэр буоллулар, маанылаах ыалдьыттарбыт үлэлээбит кэрэ кэмнэрин ахтан-санаан аастылар.

Онтон «Зарница» оонньуу дьиҥ-чахчы тургутан көрөрдүү, тиритиилээх-хорутуулаах, үгүс көлөһүн тохтуулаах киэҥ сиринэн тайаан, элбэх моһоллору туорааһыннардаах ыытылынна. Бу күрэҕи туризмҥа опыттаах учуутал Терентий Николаевич Федотов бэйэтинэн бэлэмнээн, салайан ыытта. Манна саамай аҕа саастаах Дмитрий Дмитриевич Стручков даҕаны хаалсыбакка, бүтэһигэр эдэрдэр өйөөһүннэринэн биэтэккэ кыайыы кынаттаах тиийэн кэлбиттэр да үгүс буоллулар. Интервью биэрээччилэр тыын былдьаһыытыгар сатаан эппиэттээбэккэ көр-күлүү манна буолла. Онтон салгыы уһаппакка, эт-хаан итиитинэ канат тардыһыыта, повязка былдьаһыыта буолла, кыайыылаахтар Пионерскай знамя иннигэр хаартыскаҕа түһэр чиэскэ тигистилэр.

70-80 сыллардааҕы муода көрдөрүүтэ, концерт буолла. Түмүгэр улууска биллэр кэрэ куоластаах оһуокай этээччи учууталбыт Розанна Васильевна Герасимова киэҥ түһүлгэҕэ кими да хаалларбакка түмэ тарта. Сайыны, айылҕа уһуктуутун айхаллыы оһуокай дьиэрэйдэ.

Түмүгэр Елена Алексеевна: « Наһаа да үчүгэйдик тэрийэр эбиккит, олус да астынным»- диэн махталын биллэрбитэ биһиэхэ инникигэ кынаттыыр улахан сыанабыл.

Зинаида Стручкова.